Finansije i Osiguranje - Makedonija

Секоја трета компанија аплицирала за финансиска помош

„Светската банка вели дека нашата држава најлесно ќе ја преброди оваа криза во споредба со земјите во регионот. Тоа се должи на навремените и опсежните економски мерки“, рече Заев.

Во моментот, како што посочи првиот човек на СДСМ, голем интерес има за помошта за плата од 14.500 денари за вработен за која досега аплицирале 23.359 компании или околу 30 отсто од активните субјекти. За оваа мерка имаат аплицирано 6.000 самостојни вршители на дејност или повеќе од 45 отсто од регистрираните.

„Овие бројки кажуваат дека секоја трета компанија има аплицирано за финансиска помош до 14.500 денари за исплата на плата по вработен. Обезбедивме линии на брзи бескаматни кредити Ковид 1 и Ковид 2 во вкупен износ од 13,7 милиони евра, коишто ги таргетираат сите микро, мали и средни претпријатија погодени од кризата. Од линијата кредити Ковид 1 досега се одобрени вкупно 631 кредитни апликации за исто толку компании со 5,588 вработени. За втората линија бескаматни кредити – Ковид 2, се примени 2.400 апликации. Повикот е објавен на 29ти април, а ќе трае до 13ти мај 2020 година. Наскоро преку комерцијалните банки ќе биде пласирана и линија со исклучително поволни кредити во износ од 51 милион евра. На овој начин им помагаме на компаниите да ја задржат ликвидноста, но и да ги задржат своите вработени. За нас важни се секое работно место и секој работник“, рече Заев.

Тој додаде дека заедно со поволностите од уредбата, која обезбедува ослободување од плаќање на износот на аконтациите на данок на добивка и данок на личен доход за март, април и мај 2020 година, придобивките од овие две уредби ги искористија речиси 1.300 компании, а поднесени се приближно 1.800 апликации, кои се обработуваат.

Севкупно, како што заклучи Заев, бројот на компании што добиле некаков вид помош и кои аплицирале за поддршка изнесува речиси 30.000 компании.